Илим Карыпбеков ашыкча сын-пикирден кийин «Салам, Кыргызстан» көрсөтүүсүн жапты

«Салам Кыргызстан» көрсөтүүсү  бул убакка чейин өз күйөрмандарын топтой алганы берүүлөрдүн катарын толуктап келген.Акыркы убакта социалдык түйүндүн колдонуучулары алып баруучулардын келген конокторго айткан ашкере сындары, сүйлөө этикасын сактабагандыгын жазып,нааразычылыктарын билдирип жатышкан.Бүгүн КТРКнын башкы директору аталган берүүнү жабуу чечимин кабыл алгандыгын өзүнүн социалдык барачасына төмөндөгүдөй жазып чыкты:

“Саламатсыздарбы, урматтуу достор! «Салам Кыргызстан» көрсөтүүсү боюнча маалымат берүүнү чечтим. Интернет булактарында таркап, талкууга алынып жаткан ырчы Клара Алибекова жана «чыпалак баатыр» боюнча көрсөтүүлөрдү карап чыгып төмөнкүнү билдирем.

Клара Алибекова жөнүндө көрсөтүү бир жылдан ашык мурда болгон экен. Бирок бул көрсөтүүнү жана «чыпалак баатыр» жөнүндө болгон окуяны мен дагы туура эмес, этикалык көрүнүштүн чегинен чыгып кеткен деп кабыл алып, жана дагы башка көптөгөн көрөрмандардын сын-пикирлерин эске алып «Салам Кыргызстан» көрсөтүүсүн токтотуу боюнча чечим кабыл алдым. Тартылып, эфирге даярдалып калган көрсөтүүлөрүн дыкаттык менен карап чыгып, эфирге чыгарабыз. Ал эми көрсөтүүнүн концепциясын, алып баруучуларын кайра карап чыгып, көркөм кеңештин кароосуна жөнөтүлүүсү сунушталды.

Биздин туруктуу көрөрманыбыз болуп, конструктивдүү сын-пикир берип, көрсөтүүлөрүбүздүн жакшыруусуна чоң салым кошуп атканыңыздарга ыраазычылыгымды билдирем!

Урматым менен!”